محمد طلعت يكتب: أنا ونجيب ساويرس وإيلون ماسك

الخميس، 18 ديسمبر 2025 05:03 م

محمد طلعت

"هو مين إيلون ماسك؟"
سؤال مباغت كان بداية كلام مع شخص عزيز على قلبي استغربت في الأول إزاي ما يعرفش أغنى رجل في العالم الشخص اللي أخباره بتتصدر عناوين الصحف والمواقع العالمية المتخصصة منها والعامة؟

لكن لما فكرت شوية لقيت إنه عنده حق ليه لازم نعرف إيلون ماسك؟

أغلب الناس مشغولة بجري يومي صعب عشان لقمة العيش ناس بتتنقل من شغل لشغل ومش فاضية تتابع أخبار ملياردير عايش في قارة تانية وحتى لو فتحوا تطبيق إكس اللي هو تويتر سابقا زي ما بيتكتب في كل الأخبار واللي ملك لإيلون ماسك ممكن ما يهمهمش اسمه.

الكلام ده بيتكرر كل يوم مع ملايين الأشخاص في بلدنا.

كم واحد فينا بيستخدم فيسبوك أو إنستجرام أو واتساب من غير ما يفكر مين الشركة اللي وراهم أو مين صاحبه.

وسط تفكيري جاتلي فكرة مقارنة بين إيلون ماسك البعيد وبين نجيب ساويرس هنا في مصر.

الشخص اللي كنت بكلمه ممكن يعرف ساويرس أكتر مش لأنه بيتابع البورصة لكن لأنه شايف أثره بعينه في مشاريع واستثمارات في مشاريع حوالين الأهرامات أو في مشروعات تانية تبع شركته الإنشائية أو حتى في مطالباته بتعديل الحد الأدني للأجور زي ما تكلمنا في مقال سابق
وساعتها سألت نفسي إيه اللي يربطني أنا المواطن البسيط العادي اللي بيحاول شق طريقه بهؤلاء المليارديرات أو يمكن تريليونات في حالة ماسك وليه حطيت اسمي جنب نجيب ساويرس وإيلون ماسك، هل ده طموح ولا مبالغة؟

ولكن في الحقيقة إنه فيه رابط حقيقي بيجمعنا وهو الوقت فإحنا الثلاثة بنملك الـ24 ساعة نفسها وبنعيش في عالم بقى قرية صغيرة لدرجة أن تغريدة من ماسك وهو قاعد على مكتبه في كاليفورنيا ممكن تأثر على سعر السلعة اللي يبشتريها جاري في الشقة اللي جنبي وقرار استثماري من ساويرس ممكن يفتح باب رزق لناس كتير حوالينا.

بس حقيقي الفرق الوحيد بينا احنا التلاتة أن ماسك بيخطط لغزو المريخ وساويرس بيخطط لصفقات كبرى تغير ملامح الاستثمار الشخصي أما أنا ومعايا الملايين من الناس العادية فكل خططنا هي لكيفية النجاة في عالم صممه هؤلاء، عالم اتعمل على مقاسهم.

احنا التلاتة "تروس" في ماكينة واحدة لكن الفرق أن فيه شخص بيملك الماكينة وفيه اللي بيسعى عشان ماتدهسوش تروسها.

وقتها عرفت أن الشخص العزيز على قلبي اللي سألني "مين إيلون ماسك؟"هو الشخص الأكثر حكمة بينا.

هو بيعيش واقعه في صدق مايهموش مليارات لم يلمسها ولا بصراعات رقمية على x لا تسمن ولا تغني من جوع.

هو يركز في معركته الخاصة وده في حد ذاته نجاح لا يقل عن نجاحات أباطرة المال.

بيني أنا وساويرس وماسك خيط رفيع من السعي كل واحنا مننا بيجري في مضماره لكن في نهاية اليوم العبرة مش بمين يملك أكثر لكن بمين قدر يسيب أثر حقيقي في حياة من حوله حتى لو كان الأثر هو مجرد جملة بسيطة تسأل في براءة: "هو مين إيلون ماسك؟".

محمد طلعت يكتب.. معركة الحد الأدنى للأجور بين الحكومة ونجيب ساويرس

تابع موقع إيجي إن، عبر تطبيق (نبض) اضغط هــــــــنا.
تابع موقع إيجي إن، عبر تطبيق (تيليجرام) اضغط هــــــــنا.
تابع موقع إيجي إن، عبر قناة (يوتيوب) اضغط هــــــــنا.
تابع موقع إيجي إن، عبر تطبيق (واتساب) اضغط هــــــــنا

إيجي إن-Egyin، هو موقع متخصص في الصناعة والاقتصاد، ويهتم بتقديم خدمة صحفية متميزة للقارئ، وهدفنا أن نصل لقرائنا الأعزاء بالخبر الأدق والأسرع والحصري، إضافة للتغطية والمتابعة على مدار الـ24 ساعة، لـ"أسعار الذهب، أسعار العملات، أسعار السيارات، أسعار المواد البترولية"، في مصر والوطن العربي وحول العالم.