ليه الذهب غالي؟ تكلفة إنتاج الأونصة وسر ارتفاع السعر عالميًا (فيديو)

رغم الارتفاع الجنوني في أسعار الذهب حول العالم، إلا إن تكلفة إنتاج أونصة الذهب أقل بكتير من سعر بيعها، تكلفة الاستخراج عالميًا بتتراوح غالبًا بين 800 و1100 دولار للأونصة، وبتتوزع على مراحل التعدين، والمعالجة، والمصاريف الإدارية، والضرائب، وتكاليف التشغيل والاستدامة، في حين إن تكرير الأونصة نفسها لا يتعدى 10–15 دولار. 

وبتختلف التكلفة من منجم للتاني حسب الكفاءة، فالمناجم الأعلى كفاءة بتنتج الأونصة بتكلفة أقل من 1000 دولار، بينما المناجم مرتفعة التكلفة ممكن تتجاوز 1500 دولار.

لكن المدهش إن سعر الذهب ليس له علاقة مباشرة بتكلفة إنتاجه، لأن السعر بيتحدد بعوامل اقتصادية ومالية عالمية. 

في 2024 مثلًا، تجاوز سعر الذهب 2200 دولار للأونصة رغم إن متوسط تكلفة الإنتاج كانت حوالي 1250 دولار، وده لأن الذهب بيتأثر بأسعار الفائدة الحقيقية، وتوقعات التضخم، وقوة الدولار الأمريكي، وكمان مشتريات البنوك المركزية، اللي بقت لاعب أساسي في دفع الأسعار لأعلى باعتباره ملاذًا آمنًا وقت الأزمات.