محمد طلعت يكتب.. عودة محمد منصور لمصر تُنهي أسطورة لندن جنة الأثرياء

السبت، 20 ديسمبر 2025 09:47 م

محمد طلعت

بقلم محمد طلعت

خبر لا يمكن أن يمر مرور الكرام، لإن رجل الأعمال محمد منصور، ليس مجرد رجل أعمال عادي يعود لبلده، لأنه في 2016 اختار لندن لتكون مكان الاستقرار والأعمال، وكان من أكبر الداعمين لحزبها الحاكم، لكن في عالم الاستثمار مفيش حاجة ثابتة، عشان كده رحيله عن بريطانيا يكشف حقيقة واضحة، وهى إن بريطانيا مابقتش جنة للأثرياء زي زمان.

ودلوقتي كل يوم وكالات الأنباء العالمية بتتكلم عن هروب رؤوس أموال وأصحاب المليارات من بريطانيا العظمى، بسبب الضرائب العالية، وفي المقابل مصر بتظهر كخيار استثماري قوي وجذاب.

رجوع محمد منصور رسالة واضحة إن المناخ الاستثماري في مصر بقى أكثر مرونة وقادر يستقبل استثمارات كبيرة وشهادة جدارة دولية لمناخ استثماري مصري، أثبت أنه أكثر مرونة واستيعابا للثروات الكبرى من الأنظمة التقليدية المتهالكة في القارة العجوز، وإن دول كتير من اللي كانت مستقرة، بدأت تفقد بريقها قدام واقع اقتصادي جديد.

قرار محمد منصور صاحب الـ 77 عاما مكنش مجرد إجراء إداري في سجلات الشركات البريطانية، لكنه قراءة دقيقة لمشهد سياسي واقتصادي متأزم، فبحسب تقارير بلومبرج، تعيش المملكة المتحدة حالة من نزوح الثروات نتيجة السياسات الضريبية الجديدة اللي بتستهدف أصحاب الدخول المرتفعة، الصدمة في بريطانيا بتكمن في أن منصور مكنش مستثمر عادي، لكنه كان أمينا لخزانة حزب المحافظين وأحد أكبر المتبرعين، وافتكر إنه في 2023 قدم تبرعا بقيمة 5 ملايين جنيه إسترليني، عشان كده لما يقرر أحد أكبر داعمي الحزب الحاكم الرحيل، فده بيقول إن البيئة التشريعية والمالية هناك باتت طاردة بامتياز.

لو جينا للغة الأرقام فأكيد أي تحرك لرجال الأعمال مبيكنش بدافع العاطفة فقط، لكن بلغة الأرقام اللي بتؤكد إن السوق المصري دلوقتي واجهة جاذبة للاستثمار

تعالوا نشوف شوية أرقام كده وهى هتقولنا ليه واحد زي محمد منصور رجع لمصر وساب بريطانيا..

أولا، إن فيه نزوح قياسي من لندن، والتوقعات بتقول إنه على نهاية 2025 هيكون عدد المليونيرات اللي غادروا بريطانيا وصل لـ 16,500 مليونير، وده هربًا من توجهات حكومية لرفع ضريبة أرباح الاستثمار لتصل إلى مستويات قياسية.

ثانيًا، فيه ريادة مصرية، حيث تصدرت مصر القارة الأفريقية في جذب الاستثمار الأجنبي المباشر لعام 2024 وحلت في المركز التاسع عالميًا، وكمان سجل صافي الاستثمار الأجنبي المباشر في مصر خلال العام المالي 2023/2024 نحو 46.1 مليار دولار، وده رقم تاريخي، ويعكس الثقة المتزايدة في الاقتصاد المصري بعد الصفقات الكبرى زي رأس الحكمة،

ورغم إن صافي الاستثمار الأجنبي المباشر في مصر 2024/2025 سجل 12.2 مليار دولار فقط، لكن في نوفمبر الماضي وقعت مصر صفقة علم الروم مع قطر، واللي اجمالي استثماراتها بيوصل لأكتر من 29 مليار دولار.

كما تمثل عودة محمد منصور رسالة ترويجية عالمية لمناخ الاستثمار المصري لعدة أسباب:

أولًا، إنها شهادة ثقة وإشارة للمستثمرين الأجانب بأن الإصلاحات الهيكلية والرخص الذهبية في مصر، بدأت تؤتي ثمارها.

ثانيًا، في الوقت اللي أوروبا بتفرض قيودا مالية معقدة، تقدم مصر حوافز استثمارية وقطاعات بكر في الطاقة والبنية التحتية وكمان في التكنولوجيا، وهى استثمارات بتضمن عائد على الاستثمار، لا يمكن أبدا تحقيقه في الأسواق المشبعة زي أسواق أوروبا.

رجوع محمد منصور بيقول إن رأس المال لا يعرف الحدود، لكن يعرف لغة الأمان والنمو.

وهجرة الثروات من لندن تؤكد أن القواعد القديمة سقطت وانتهت فبينما يراقب العالم بقلق سياسات التضييق المالي في أوروبا تقدم مصر نموذجا لسوق ناشئ يمتلك الجرأة على جذب الكبار.

مجموعة منصور تقدم «IM Motors» في مصر، جيل جديد من السيارات الكهربائية

14 معلومة عن مصنع "ماك" لصناعة السيارات في مصر

تابع موقع إيجي إن، عبر تطبيق (نبض) اضغط هــــــــنا.
تابع موقع إيجي إن، عبر تطبيق (تيليجرام) اضغط هــــــــنا.
تابع موقع إيجي إن، عبر قناة (يوتيوب) اضغط هــــــــنا.
تابع موقع إيجي إن، عبر تطبيق (واتساب) اضغط هــــــــنا.

إيجي إن-Egyin، هو موقع متخصص في الصناعة والاقتصاد، ويهتم بتقديم خدمة صحفية متميزة للقارئ، وهدفنا أن نصل لقرائنا الأعزاء بالخبر الأدق والأسرع والحصري، إضافة للتغطية والمتابعة على مدار الـ24 ساعة، لـ"أسعار الذهب، أسعار العملات، أسعار السيارات، أسعار المواد البترولية"، في مصر والوطن العربي وحول العالم.