يوسف بطرس غالي من لندن للقاهرة.. كواليس الغربة وأسرار سنوات وزارة المالية

أطل يوسف بطرس غالي وزير الماليه الاسبق، على الساحة الإعلامية خلال الساعات الماضية ليحاكي أدق التفاصيل الاقتصادية خاصة أموال المعاشات في عهده وادخالها البورصة المصرية لإنعاشها وإحداث حالة من التوازن الاقتصادي، رويات عديدة كشفها عنا في لقاء مع الإعلامية لميس الحديدي نبرز تفاصيلها.

يوسف بطرس غالي

كشف  الدكتور يوسف بطرس غالي  وزير الماليه الاسبق عن مشاعره  بعد عودته إلى الوطن، بعد خروجه من البلاد  إبان ثورة يناير 2011، واصفًا سنوات الغربة بأنها كانت أشبه بمن يعيش في الصحراء، رغم إقامته في العاصمة البريطانية لندن.
وقال، خلال لقائه في بودكاست "موعد مع لميس"، الذي تقدمه الإعلامية لميس الحديدي: " الغربة  زي الواحد اللي كان قاعد في صحرا وفجأة رجع لقى مدينة مستنياه ومحلات ونور وبيت وغيره.. يعني إنجلترا ناس طيبين وبلد متقدم وعظيم وبتاع، لكن مش أهلي. وبالتالي كنت أنا بتكلم إنجليزي ما عنديش مشكلة".

وردًا على سؤال الحديدي: "بتتكلم كم لغة؟"، قال: "خمسة.. كانوا 6، في واحدة طارت، اللي هي البرتغالي.. مفيش ممارسة".

وأوضح أنه، رغم الحياة العصرية والتقدم الكبير في لندن، ظل يشعر طوال سنوات الغربة بالحنين إلى الوطن، قائلًا: "مش أهلي، مش ناسي، لندن في منتهى الجمال.. أنا بيتي بيدي على جنينة، على هايد بارك،.. جميلة لكن مش ناسي، مش أهلي".

وأضاف: "الإنجليز ظراف وطيبين ومؤدبين، والبلد ماشية، والاتصالات والمواصلات، وما كانش عندي عربية هناك لأني ما كنتش محتاج عربية، تلاقي تاكسيات طول الوقت، ووسائل انتقال موجودة في كل حتة، لكن مش بيتنا، مش ناسنا.. فكان واحشني ناسنا".

وكشف الدكتور يوسف بطرس غالي، وزير المالية الأسبق، أنه عاد إلى مصر في أوائل عام 2025، وتحديدًا في شهر فبراير، مؤكدًا أن أول ما فاجأه عقب وصوله إلى مطار القاهرة كان وجود وزير المالية الدكتور أحمد كجوك في استقباله.

وأضاف: "أنا صُعقت بإن لما جيت لقيت وزير المالية أحمد كجوك كان قاعد مستنيني.. قلت له: يا أحمد إنت فاضي؟ أنا مواطن من المواطنين، هو كل واحد هيجي هتستقبله؟ قال لي: لا يمكن".

وأعرب غالي عن تقديره الكبير لوزير الماليه   أحمد كجوك، قائلًا: "محبتي له لا حدود لها، سواء لما كنا بنشتغل مع بعض أو حاليًا، فالصدمة كانت مخففة بإن أنا لقيت أليف، واحد مستنيني أعرفه، وخدنا بعض بالحضن، وكان محبة شديدة، فدي كانت أول مرور في المطار".

وكشف غالي أنه، رغم توليه منصب وزير في حكومات متعاقبة منذ أبريل 1993 وحتى يناير 2011، أي ما يقرب من 20 عامًا، فإنه لم يشاهد مطار القاهرة بالشكل الذي يراه المواطنون، نظرًا لأنه كان يغادر ويصل دائمًا عبر قاعة كبار الزوار.

يوسف بطرس غالي الناس بتقابلني بحب شديد

وقال: "أنا اتعينت وزير في إبريل 1993، وقعدت وزير لحد يناير 2011.. ماشفتش شكل مطار القاهرة ده، والوزراء بيطلعوا من كبار الزوار وبيوصلوا كبار الزوار، فكل الفترة دي عمري ما شفت المطار بتاع كل الناس.. كان لأول مرة هشوفه؟! برضه لأ، خدوني من تحت الطيارة قالوا لي الوزير مستنيك، فكان صدمة عظيمة وسعيدة جدًا".

أجاب الدكتور يوسف بطرس غالي، وزير المالية الأسبق، على سؤال الإعلامية لميس الحديدي حول ما إذا كان شعر بأن الناس تغيرت بعد عودته إلى مصر عقب 14 عامًا من الغربة، مؤكدًا أن أكثر ما لفت انتباهه هو حجم المحبة التي وجدها من المواطنين، قائلاً: "الناس بتقابلني بحب شديد".

وقال، خلال لقائه في بودكاست "موعد مع لميس"، الذي تقدمه الإعلامية لميس الحديدي: "طول الوقت بيتصوروا معايا كتير أوي، وبيقابلوني بحب كتير أوي، وده أنا اندهشت، لأنه عادة وزير المالية ما بيبقاش محبوب".

وقاطعته الإعلامية لميس الحديدي بسؤال: "هل عندما كنت وزير مالية كنت محبوبًا؟"، ليرد: "وزير المالية بياخد فلوس من جيبك، هتحبي فيه إيه؟ لكني اندهشت إن في محبة وود ومودة في كل حتة، وناس ما أعرفهاش ومن مستويات شعبية، يعني لا يمكن تكون احتكت لا بسياسات ولا قرأت كتابات".

مش قادر أتكلم عن أحوال البلد 

وعن أكثر ما افتقده في مصر خلال سنوات الغربة، قال: "كوني مش قادر أتكلم عن أحوال البلد مع ناس فاهمة أحوال البلد. كنت أقرأ جرايد وأشوف تليفزيونات وأقدر أستنتج ماشية إزاي، لكن كان بيوحشني إني أقعد مع حد عايش في مصر بيواجه مشاكل مصر أتكلم معاه، أقول له إيه اللي مش ماشي وإيه اللي ماشي. الواحد قعد تقريبًا 20 سنة في الحكومة، وبالتالي بتحسي بمسؤولية كأننا ربينا حاجة ومسؤول عنها مهما بعدنا، فده اللي كان بيوحشني أكتر حاجة".

وقال الدكتور يوسف بطرس غالي، وزير المالية الأسبق، إن تراجع أعداد الأشخاص المحيطين بالمسؤول بعد خروجه من السلطة أمر طبيعي، وذلك ردًا على سؤال الإعلامية لميس الحديدي حول ما إذا كان الكثيرون كانوا  يسألون عنه خلال سنوات الغربة او بعد عودته ممن كانت تربطهم  بهم علاقات ".
واستعاد غالي حديثًا دار بينه وبين زوجته الراحلة، قائلًا: "مراتي الله يرحمها قالت لي: أدي شايف كل اللي حواليك دول؟ مش هتلاقيهم.. يوم ما نخرج مش هتلاقيهم حواليك، قلت لها: عارف".

ميكانيكي الاقتصاد

علق الدكتور يوسف بطرس غالي، وزير المالية الأسبق، على لقب "ميكانيكي الاقتصاد" الذي أطلقه على نفسه خلال توليه وزارة المالية، مؤكدًا أنه لا يزال يرى نفسه يحمل هذا الوصف حتى اليوم.

وقال، خلال لقائه في بودكاست "موعد مع لميس"، الذي تقدمه الإعلامية لميس الحديدي: "اللي بيتولد ميكانيكي بيموت ميكانيكي.. ما زلت ميكانيكي، لما ببص على حاجة ببص بـ: ماشية إزاي؟ ممكن أصلحها إزاي؟ أو أخربها إزاي إذا كنت حابب.. فطبيعة الميكانيكي بتتولد ميكانيكي".

وردًا على سؤال الإعلامية لميس الحديدي: "لسه ميكانيكي؟ ولا بقيت ميكانيكي شيك كده في نفسك؟"، أجاب مازحًا: "ميكانيكي شيك وميكانيكي أغلى.. مع القطاع الخاص الميكانيكي بيبقى أغلى شوية".

وعن الفارق بين العمل في الحكومة والقطاع الخاص، وأيهما يفضل، قال: "كل واحد وله مشاكله.. ما أقدرش أقول الشغل في الحكومة كان أظرف أو أوحش.. كل طريقة لها مشاكلها".

وقاطعته الإعلامية لميس الحديدي قائلة: "بس القطاع الخاص أكسب؟ والحكومة سلطة؟"، ليرد: "أيوه طبعًا، القطاع الخاص أكسب، والحكومة سلطة، بس على حسب هتستخدميها إزاي، هتستخدميها عشان نطبل ونهيص وعشان شوية شعبية زائفة وبعدين نتكل على الله دي طريقة.. طريقة تانية هتستخدميها عشان تسيبي حاجة تفضل وراكي بعد ما تمشي دي طريقة تانية".

اقرأ أيضًا 

يوسف بطرس غالي: حسن عبد الله أفضل محافظ للبنك المركزي منذ 40 عامًا

يوسف بطرس غالي: علينا حماية الاقتصاد المصري من "طوفان" الصادرات الصينية